Duh Gusti Mahaguru

Duh Gusti Mahaguru

 

Baose ngapak saha ngopak

Sat sardulapati nedeng galak

Mangde titian sregep matindak

     Polahe baud sada nyaleadin

     Kadi wrekudara ngenyek nyandain

     Mangde titian tiaga magarapan sami

Cecingake tajep muncuk pangutik

Waluya garuda ngemit manik

Mangda titian tragia ngricik cerik-cerik

     Icane ngakak mapungkus pangos

     Laksana truna truni sedek mandus

     Mangda titian tan males manyus

Duh Gusti rumaga Guru…..

A warsa luwus lumaku

Kala ngasab anggane sampun kaku

     Kala ngenduh duka ring bucu layu

     Kala ratu budal nunggil Hyang Sadhu

Tan wenten malih baud banyole

Tan wenten malih

Tan wenten malih

Tan wenten malih

Tan wenten malih……

     Mangkin,

     Durus masolah ring suargi

     Kaemban widiadari dewata dewati

     Ri samiparing Sang Hyang Widhi

Picayang taksu sujati

Mangda titian sida sadhu sidi

Ring pikobet jagate manresti

Ring paileh kawruhan tan sinipi

 

 

 

Sukra Umanis, 5/11/04

Pakeling a warsa mantuk Prof. Dr. I Gusti Ngurah Bagus

Olih : I Made Suarsa